Diä Gnossäschaft isch ä Zämäschluss vu rund 30 Ürner Alpchääsproduzäntä. Si isch am 3. Juni 1996 als Sälbschthilforganisazion ggrindet wordä. Si gaht uf nä Schtrit zwischet dä Chääshäntler und dä Ürner Älpler zrugg. Der isch de so wit ggangä, dass sich d Chääshäntler gwäigeret hent, Chääs vu dä Ürner Alpä z ubernäh. Üs dem Grund het sich d Gnossäschaft vorgnu, dä Härschteller vu Ürner Alpchääs ä grächtä Absatzpriis fir das qualitativ ussergwehntlichi Produkt z garantiärä.

D Gnossäschaft vermarktet inzwischä jährlich 50 Tonnä vu dä rund 200 Tonnä Alpchääs, wo pro Jahr im Bärgkanton produziärt wird. Gschäftsfiärer vu dr Gnossäschaft isch dr Franz Furrer üs Altdorf. Und är isch uberzigt vum Ürner Alpchääs: «Dr Ürner Alpchääs isch äs Produkt, wo äinä äifach packt.»

Chääs i Verchäüf chunnt, wird är im Chääs-Chäller vu dr Gnossäschaft z Ättighüüsä glaageret. Det wärdet diä äinzelnä Chääs all par Tag mit Wasser pflägt. Das Schmiärä, wiä mä äü säit, sorget fir nä gwissi Fiächti und git äm Alpchääs ä züäsätzlichä Gschmack.